Proxectos nacionais

VITICAST

VITICAST é un grupo operativo supra-autonómico cuxa finalidade é achegar solucións innovadoras na predición de enfermidades fúnxicas no viñedo.

Ten como obxectivo a optimización da produción e o desenvolvemento sustentable do cultivo da vide nas provincias bioclimáticas máis importantes do noroeste peninsular (parcelas obxecto de estudo situadas nas DDOO Rías Baixas, Ribeiro, Valdeorras e Ribera del Duero) a través da innovación no manexo das enfermidades fúnxicas de maior incidencia (mildio, oídio e botrite).

No proxecto desenvólvese unha ferramenta de aviso de posibles infeccións na que se combinarán: datos meteorolóxicos medidos a pé de parcela, predición dos estados fenolóxicos da vide e concentración de esporas e inóculo necesario para que se produza a infección. Esta ferramenta permitirá estimar con antelación a produción da colleita, así como reducir os tratamentos antifúnxicos aplicados no viñedo. Facilitará, polo tanto, o traballo de cooperativas e adegas vitivinícolas, contribuíndo á elaboración dun viño de maior calidade e a unha produción máis sustentable, ao minimizar a incidencia da aplicación de fitosanitarios no medio ambiente.

Os Grupos Operativos, actores principais da implementación da AEI-Agri (Asociación Europea de Innovación en agricultura produtiva e sustentable), son unha das ferramentas clave na execución do Programa Nacional de Desenvolvemento Rural 2014-2020 para impulsar a innovación no sector agroalimentario e forestal dentro do ámbito europeo. Trátase da agrupación de axentes de diferente perfil con intereses comúns, tales como agricultores/as, gandeiros/as, empresas, centros de investigación ou de formación e divulgación, que se asocian para poñer en marcha un proxecto de innovación co obxecto de dar unha resposta conxunta e multisectorial a un problema ou necesidade.

Máis información:

 

Tríptico do proxecto.

FINANCIACIÓN

Mediante a Resolución do 26 de febreiro de 2019, do Fondo Español de Garantía Agraria, O. A. (FEGA), pola que se convocan axudas para a concesión de subvencións á execución de proxectos de innovación de interese xeral por grupos operativos da AEI-Agri, no marco do Programa Nacional de Desenvolvemento Rural 2014-2020, para o ano 2019, o grupo operativo «Solucións innovadoras para a predición de enfermidades fúnxicas na vide» (VITICAST) recibe unha subvención de 599.957,11 €, cofinanciada nun 80 % polo Fondo Europeo Agrícola de Desenvolvemento Rural (FEADER) e nun 20 % por fondos da Administración Xeral do Estado, como establece o Real Decreto 169/2018, do 23 de marzo. A Dirección Xeral de Desenvolvemento Rural, Innovación e Política Forestal é a autoridade de xestión encargada da aplicación da axuda do FEADER e nacional correspondente.

ORZAMENTO

615.249,11 euros

SOCIOS

Membros participantes:

  • Monet Tecnología e Innovación S.L. (representante do grupo operativo)
  • Viña Costeira S.C.G.
  • Bodega Hacienda Monasterio S.L.
  • Bodega Matarromera S.L.
  • Estación Fitopatolóxica Areeiro (Deputación de Pontevedra)
  • Universidade de Vigo (grupo de Planta, Solo e Aproveitamento de Subprodutos)
  • Fundación Empresa Universidad Gallega (FEUGA)

Membros subcontratados:

  • USC (grupo de Cromatografía e Quimiometría)

Membros colaboradores:

  • Plataforma Tecnolóxica do Viño (PTV)
  • Asociación de Colleiteiros Embotelladores do Ribeiro (ACER)
  • Asociación Galega de Viticultura (AGV)

WEB

https://viticast.es/

Casos de éxito