ACTUALIDADE

08-09-21

FEUGA lidera o proxecto de innovación AVIENERGY

De residuo avícola a recurso enerxético, valorizando os excrementos xerados nas explotacións avícolas (produción de carne e ovos) para a obtención dunha fonte de enerxía renovable, de fertilizantes e compoñentes para o aproveitamento de nutrientes en chan. Estes son os obxectivos principais de AVIENERGY, o novo Grupo Operativo de carácter supra-autonómico que comprende as rexións de Galicia, Castela e León e Murcia, e que conta cun financiamento de máis de medio millón de euros do Fondo Europeo Agrícola de Desenvolvemento Rural (FEADER) e do Ministerio de Agricultura, Pesca e Alimentación, no marco do Programa Nacional de Desenvolvemento Rural 2014-2020.

Así, este proxecto innovador busca un uso máis eficiente dos recursos no sector avícola aplicando unha estratexia baseada nos fundamentos da bioeconomía circular, posibilitando un aproveitamento máis eficiente dos residuos máis abundantes como a pollinaza, a  gallinaza e a  pavinaza, para mellorar a competitividade e o impacto ambiental do sector.

A través da súa combustión, buscarase obter enerxía térmica que poderá ser empregada para satisfacer a demanda de calor existente nas explotacións. As cinzas producidas durante a combustión serán consideradas un subproducto de valor que poderá ser aplicado directamente no chan para o aproveitamento dos nutrientes existentes favorecendo o crecemento dos cultivos. Adicionalmente, AVIENERGY analizará a viabilidade de implantación dun sistema de microcogeneración baseado nun ciclo de Rankine orgánico para a obtención de enerxía eléctrica que poderá ser utilizada na propia explotación. Esta solución innovadora permitiría reducir a dependencia enerxética das explotacións.

Neste proxecto participan como membros a Fundación Empresa Universidade Galega (FEUGA), representante do Grupo Operativo, e Energylab,  Demaux Manufacture S.L., Granxa José Antonio García, Centro de Edafoloxía e Bioloxía Aplicada do Segura (CEBAS-CSIC), Universidade de Vigo, Avícola O  Charcón e Alimentos do Mediterráneo  S. Coop ( ALIMER).  UVESA e a Fundación Alimer serán membros colaboradores.

Proxecto cofinanciado nun 80% polo Fondo Europeo Agrícola de Desenvolvemento Rural (FEADER) da Unión Europea e nun 20% polo Ministerio de Agricultura, Pesca e Alimentación, no marco do Programa Nacional de Desenvolvemento Rural 2014-2020. Orzamento total: 583.672,84 €. Subvención total: 565.872,84 €.

Compárteo

Últimas novas