Vinte e dous socios de Europa e África, entre os que se atopa FEUGA, forman parte dun ambicioso consorcio que busca, a través do proxecto europeo Root2Res, deseñar sistemas de cultivos de rotación preparados contra os cambios no medio ambiente. Así, un equipo interdisciplinar traballará durante cinco anos en ferramentas para a análise das raíces de cereais (cebada, trigo), pataca, legumes (faba, chícharo, lentellas) e batata, en colaboración con viveristas, agricultores e lexisladores, abrindo a porta a novos cultivares que proporcionen seguridade alimentaria e mitigación do cambio climático.

Financiado a través do programa Horizonte Europa da Unión Europea, o proxecto Root2Res púxose en marcha durante a reunión de lanzamento celebrada en Francia do 14 ao 16 de setembro, que supuxo o inicio de tarefas como a definición dos trazos que garanten a viabilidade dos cultivos, o deseño de novas ferramentas que midan a plasticidade e heredabilidade dos marcadores xenéticos, e a coordinación cos produtores nas zonas sometidas a maior estrés climático. A iniciativa vai acompañada dun amplo plan de difusión, formación e explotación en beneficio dos usuarios finais.

A medida que os sistemas agrícolas enfróntanse a maiores deterioracións ambientais, identificar e desenvolver novos cultivares permitirá colleitas máis estables. Neste contexto, as raíces son un compoñente esencial contra a falta de nutrientes, o déficit e o exceso de auga, ademais de contribuír á captura de dióxido de carbono no chan. Abordar os trazos das raíces para viveristas, xenetistas e agrónomos é un verdadeiro reto que necesita de solucións eficientes: ferramentas de fenotipado sobre o terreo e en condicións controladas; ferramentas xenéticas con marcadores relevantes e recursos xenéticos; e modelos capaces de extrapolar os resultados a outros terreos e escenarios.

Para saber máis sobre o proxecto: www.root2res.eu